Fabos Fali 
U Burundi bwagaragaje ko Leta ya Somalia yabugambaniye ubwo yangaga ko bugumisha ingabo 2000 mu butumwa bw’amahoro bw’Umuryango wa Afurika Yunze Ubumwe (ATMIS).
Leta y’u Burundi yagaragarije iya Somalia ko mu gihe ingabo 2000 zaguma muri ubu butumwa, zatanga umusaruro ufatika. Gusa Somalia yarabyanze, yemera ko hagumayo 1041 gusa.
Tariki ya 28 Ukuboza 2024, Ambasade y’u Burundi muri Ethiopia yatangaje ko bitewe n’ubwumvikane buke bw’u Burundi na Somalia ku mubare w’ingabo zizaguma muri ubu butumwa, bwafashe icyemezo cyo gucyura zose bufiteyo guhera mu ntangiriro za 2025.
Umwe mu bayobozi bo mu Burundi yatangarije ChimpReports ko ingabo z’igihugu cyabo zitanze bikomeye mu gihe zimaze mu butumwa bw’amahoro muri Somalia, agaragaza ko kwanga icyifuzo cyabo ari ubugambanyi.
Yagize ati “Ni ubugambanyi kandi ni ukudashima kwa Somalia, dushingiye ku bwitange twagaragarije mu ntambara yacu na Al Shabaab. Umubare muto Leta ya Somalia yasabye wahungabanya ibikorwa byacu.”
Perezida w’Akanama k’Umuryango wa Afurika Yunze Ubumwe gashinzwe amahoro n’umutekano, Ambasaderi Abdi Mahamoud Eybe, yashimye ubwitange bwaranze ingabo z’u Burundi mu gihe zimaze muri ubu butumwa.
Ambasaderi Eybe yaboneyeho kunamira abasirikare b’u Burundi bapfiriye ku rugamba rwo kurwanya umutwe w’iterabwoba wa Al Shabaab muri Somalia.
Fabos Fali 
