Fabrice Nahimana Amakuru aturuka mu nzego z’ubutasi z’u Burundi, aravuga ko Umurundi Dieudonné Niyukuri wamenyekanye kuri ‘YouTube’ nka Rabin na bagenzi be barimo Umunyarwanda bari kumwe baba barishwe.
Mu Ukwakira 2025 ni bwo Rabin na bagenzi be batawe muri yombi, bafungirwa muri gereza y’urwego rushinzwe iperereza (SNR) mu yahoze ari intara ya Cibitoke, mbere yo koherezwa i Bujumbura aho bivugwa ko biciwe, nk’uko ikinyamakuru Le Mandat dukesha iyi nkuru kibivuga.
Mu mpera z’Ukwakira 2025 ni bwo Dieudonné Niyukuri na bagenzi be bambutse umupaka uhuza u Burundi n’u Rwanda, mbere yo gutabwa muri yombi.
Le Mandat ivuga ko Rabin yinjira mu Burundi hari abandi bantu bo muri iki gihugu bari bamaze igihe bavugana na we na bo baje gutabwa muri yombi na SNR, bamwe muri bo baricwa.
Dieudonné Niyukuri yari atuye mu Rwanda kuva muri 2024, aho yari yarageze avuye muri Mozambique aho yari yarahungiye mu 2015 kubera ibibazo byaturutse kuri manda ya gatatu itavugwaho rumwe ya Pierre Nkurunziza.
Kugeza ubu ntacyo Leta y’u Burundi iratangaza ku itabwa muri rye na bagenzi be bivugwa ko bazira kuba bari mu mugambi wo gushinga umutwe urwanya ubutegetsi bwa Gitega.
Le Mandat ivuga ko ubwo yageragezaga kubaza ubutasi bw’u Burundi amakuru yabo ntacyo byigeze bitanga, ariko ikavuga ko mu ntangiriro z’uyu mwaka umwe mu bayobozi bakuru muri SNR yabwiye bene wabo w’abari bafunzwe ko bari bakiriho, ariko bakaba barimo kuvuzwa bijyanye n’uko bari intere.
