Ku Cyumweru tariki 11 Werurwe 2024, Ikigo Mpuzamahanga Giharanira Amahoro cya Stockholm International Peace Research Institute (SIPRI), cyashize hanze raporo ishyira u Rwanda ku mwanya wa mbere mu bihugu bigize umuryango wa Afurika y’Iburasirazuba (EAC) byaguze intwaro nyinshi zikomeye mu myaka itatu ishize.

Iki kigo cy’abanya-Suede gikora iyi raporo ku bihugu byo ku Isi hose, ndetse kikagaragaza uburyo byagiye bigura cyangwa bigurisha intwaro zikomeye mu myaka ine ishize. Akenshi iyi raporo yibanda ku ntwaro nk’indege, za drones z’intambara, imodoka zo mu bwoko bw’ibifaru, systeme z’ubwirinzi ndetse n’imbunda z’imizinga.

Iyi raporo yakozwe ku bihugu byo ku Isi yose, yerekana ko intwaro zaguzwe n’ibihugu byose zagabanutse ugereranyije n’indi myaka ine yabanje. Ku ruhande rw’u Rwanda kandi iyi raporo igaragaza ko byibura hagati ya 2021 na 2023 u Rwanda rwaguze intwaro zikomeye zibarirwa muri 74, zirimo 58 rwaguze muri 2021 na 16 rwaguze mu 2022.

Amakuru atangazwa n’iki kigo avuga ko mu ntwaro u Rwanda rwaguze harimo imodoka z’ibifaru zo mu bwoko bwa Cobra 2 ndetse n’izindi zo mu bwoko bwa Hizir-rwaguze muri Turkiye.

Si ibyo gusa kandi kuko na mbere y’aho u Rwanda ngo rwari rwaraguze imbunda z’imizinga zo mu bwoko bwa RM-70 122MM muri Slovakia, kajugujugu enye zo mu bwoko bwa MI-35 rwaguze mu Burusiya, missile zo mu bwoko bwa Red-Arrow-9 rwaguze mu Bushinwa ndetse n’izindi ntwaro.

Iki kigo cyatangaje ko muri rusange intwaro u Rwanda rwaguze mu myaka itatu ishize gusa zingana na 3% y’izo umugabane wa Afurika waguze kuva mu 2019. Kuri uru rutonde kandi u Rwanda rukurikirwa n’ibihugu nka Uganda na yo yaguze 3% by’izo Afurika yaguze, Tanzania yaguze 52 zingana na 2.1% ndetse na RDC yaguze 51 zose yaguze mu mwaka ushize zingana na 3.5%.

Ku rwego rw’Isi iyi raporo igaragaza ko u Buhinde ari bwo bwaguze intwaro nyinshi, dore ko hagati ya 2019 na 2023 bwazishoyeho arenga $ miliyari 300. Aho bwaguze byibura izingana na 9.8% bw’izo Isi yose yaguze, ni mu gihe kandi igihugu kiza ku mwanya wa mbere mu kugurisha intwaro nyinshi ku Isi ari Leta Zunze Ubumwe za Amerika, aho yagurishije izingana na 42% z’izagurishijwe ku Isi hose.