Fabrice Nahimana Inama y’Abaminisitiri yateranye ku wa Gatatu tariki ya 28 Mutarama 2026, yemeje umushinga w’itegeko rishyiraho Kaminuza y’Igihugu ya Gisirikare.
Iyi Kaminuza izwi nka National Defence University, ni yo ya mbere ya gisirikare izaba ishinzwe mu Rwanda.
Muri Gicurasi 2024 ni bwo Minisitiri w’Ingabo, Juvenal Marizamunda, yabwiye abasenateri ko u Rwanda rwateganyaga kubaka Kaminuza ya gisirikare izaba irimo n’ishuri rifite ubushobozi n’umwihariko wo kwakira no kwigisha abasirikare kugeza ku bo ku rwego rwa ba Jenerali.
Icyo gihe yasobanuye ko mu Rwanda hasanzwe amashuri menshi ya Gisirikare, ariko ko ari ku rwego rwa Kaminuza ari Ishuri rya Gako rizwi nka Rwanda Military Academy, n’Ishuri rya Nyakinama rishobora kwigisha abasikare bo mu rwego rw’Abofisiye bakuru barimo ba ‘Major’, Lt Colonel na ba Colonel iyo bikabije.
Yunzemo ati: “Tugiye kuzashyiraho n’ikindi cyiciro cy’Ishuri cyitwa National Defence College gifata guhera kuri ba Colonel kuzamuka na Jenerali.”
Biteganijwe ko Kaminuza y’Igihugu ya Gisirikare igiye gushingwa izahuriza hamwe National Defence College n’andi mashuri ya gisirikare asanzwe mu gihugu.
Ni Kaminuza yitezweho kujya itanga inyigisho mu nzego zose z’uburezi bwa gisirikare, harimo amahugurwa shingiro y’abasirikare bakuru (officers), amasomo y’ubuyobozi bw’ikorwa (operational command), n’amasomo yo ku rwego rwo hejuru y’igenamigambi n’inyigisho z’ingenzi (advanced strategic studies).
Biteganijwe kandi ko abasirikare bashya baje kwiga muri iriya Kaminuza bazajya bahabwa ubumenyi bwa tekiniki n’amayeri (tactical skills), abasirikare bageze hagati mu mwuga bahabwe ubumenyi bwo guteza imbere ubuhanga mu bikorwa (operational expertise), na ho abakuru bo ku rwego rwo hejuru bunguke ubumenyi mu gukora igenamigambi.
NDU ishobora no kuzajya iteza imbere ibikorwa by’ubushakashatsi no gukorana n’izindi nzego n’ibigo mpuzamahanga.
Bitandukanye na kaminuza za gisivili nka Kaminuza y’u Rwanda, NDU izibanda by’umwihariko ku masomo ya gisirikare n’ay’umutekano bigenewe abakozi ba RDF n’abasivili batoranyijwe bakora mu nzego zifitanye isano n’umutekano.
Igitekerezo cya NDU cyatangiye mu 2018, ubwo abayobozi ba RDF bagiranaga ibiganiro n’abafatanyabikorwa mpuzamahanga, barimo na United States National Defence University.
