Fabrice Nahimana Ambasaderi w’u Rwanda i New York mu muryango w’Abibumbye, Martin Ngoga, yahakanye ibirego by’u Burundi bushinja u Rwanda kurasa ku butaka bwabwo.
Amb. Ngoga yasubizaga mugenzi we, Zéphyrin Maniratanga uheruka kubwira akanama ka Loni gashinzwe amahoro n’umutekano ko u Rwanda rwarashe ku butaka bw’u Burundi, ndetse agatanga umuburo w’uko mu gihe ibyo byakomeza ibihugu byombi bishobora kwisanga mu ntambara yeruye.
Amb. Martin Ngoga yabwiye akanama ka Loni ko u Rwanda rutigeze rurasa ku butaka bw’u Burundi, ndetse ko nta na gahunda rufite yo kujya mu ntambara n’uriya muturanyi warwo.
Ati: “Ndashaka gutanga umucyo ko nta ntambara u Rwanda ruri gushoza kuri Repubulika y’u Burundi, nta na gahunda rufite yo kubikora. U Burundi ahubwo hari igitero cyagabwe mu gace ka Bugarama ko mu Rwanda giturutse ku butaka bw’u Burundi, ndetse bunabigaba muri bimwe mu bice bya RDC, bituma impunzi zaho zihungira mu Rwanda.”
