Ibi byatangajwe na perezida w’u Burundi, Evariste Ndayishimiye avuga ko banki zo muri iki gihugu ndetse n’igihugu muri rusange byugarijwe n’ibibazo by’ubukungu, aho banki zidafite amafaranga ahagije ndetse bikomeje gutya igihugu kikaba cyakwisanga mu bihe bigoye. Yahise atangaza ko umuturage aramutse asabye inguzanyo ya miliyoni 15 z’amarundi nta Bank yayamuha.

Muri iki cyumweru n’ibwo perezida Evariste yagiranye ibiganiro n’abayobozi mu nzego zitandukanye zireberera ubukungu bw’Igihugu, yasabye abayobozi bahagarariye za banki guhindura umuvuno hakiri kare hagamijwe kuzamura ubukungu bw’igihugu ndetse bashakire iki kibazo umuti.

Bamwe mu baturage baganiriye n’itangazamakuru bavuga ko bafite ikibazo kuba amafaranga y’abo bayabitsa muri banki nyuma bataba bakiyafiteho uburenganzira k’uko aba yageze mu maboko ya Leta. Umuyobozi w’Ishyirahamwe ry’abavunja amafaranga mu Burundi Tresor Ndayishimiye mu gushimangira iki kibazo yagize icyo abivugaho.

Ati” Mu minsi ishize twashoboye gukusanya arenga miliyari 140 z’Amarundi.twayashikirije ama banki y’ubucuruzi kuva ubwo ntitwongera kubona amafaranga.tukibaza tuti none amafaranga yacu yagiye he? None murashaka ko tuyabasubiza avuye he kandi natwe ataratugarukira”.

Kuva muri Kamena uyu mwaka. u Burundi bwahinduye inoti z’ibihumbi bitanu n’ibihumbi 10. Ibi byagize n’uruhare mu gutuma amafaranga abura muri iki gihugu. Kugeza ubu hari zimwe mu ntara abaturage batemerewe kubikuza arenga miliyoni eshatu z’Amarundi n’ubwo y’aba yarayabikije.

Perezida w’u Burundi Evariste avuga ko igihugu kiri mu bihe bikomeye