Bumwe mu buryo interahamwe zakoreshaga mu kwica abatutsi mu 1994, harimo no kubahambira zikabajugunya mu mazi kugira ngo bicwe n’amazi cyangwa se baribwe n’ingona. Ubwo habaga umuhango wo gusoza icyumweru cyo kwibuka abazize Jenoside yakorewe abatutsi mu 1994 kuwa 13 mata 2023, Mukamana Athanasie yatanze ubuhamya bw’uburyo bamujugunye muri Nyabarongo inshuro 3 akayirokoka.    Ubuhamya bwa Mukakibibi wategetswe kwicukurira icyobo akoresheje amazuru muri Jenoside yakorewe abatutsi mu 1994

Mukamana utuye mu karere ka Nyarugenge, Umurenge wa Kigali hafi n’inkengero z’umugezi wa Nyabarongo, yavuze ko ubwo interahamwe zamujugunyaga muri Nyabarongo bwa mbere, zamufatanye na sekuru, nyirakuru n’abavandimwe be, zirabahambiranya zibajugunya muri Nyabarongo umugezi urabatembana, gusa abandi bose barapfuye we umugezi umutembana umujyana mu byatsi biri ku nkombe.

Yakomeje avuga ko yageze ku byatsi akabifata akabikomeza cyane kugeza ubwo yaje gukurwamo n’undi mubyeyi na we bari baroshye mu byatsi azi koga akamwambutsa akamugeza hakurya ya Nyabarongo. Mukamana yavuze ko bakimara kuva aho ngaho bahise bafatwa n’abasirikare b’icyo gihe babajyana aho bari batuye babafata kungufu, barabakubita babagira intere we baranamutemagura, nyuma basubira kubajugunya mu byatsi gusa kubw’amahirwe make mugenzi we ahasiga ubuzima.

Kuri iyi nshuro nabwo amazi yamujugunye ku nkombe ahari ibyatsi. Nyuma yaje kwigira inama yo kujya kwa nyirakuru ahitwa ku Rwesero ahungirayo kubw’amahirwe asanga nyirakuru arahari, gusa nabwo ntago byaje kugenda neza kuko bagabweho igitero n’interahamwe zirabakubita zibagira intere, zirangije zijya kubajugunya muri Nyabarongo aho yakuwe n’inkotanyi.

Mu gusoza ubuhamya bwe Mukamana yavuze ko Nyabarongo ayifata nk’umuryango we, ayifata nka sekuru, nyirakuru n’abavandimwe be bose bayitikiriyemo muri Jenoside yakorewe abatutsi. Yakomeje avuga ko kandi abayeho kubera inkotanyi zitanze zikarokora ubuzima bwe, zihanganiye ibibazo byose byahuye na zo zigakiza abantu kuri ubu akaba yariyubatse mu buryo bugaragara. Src: kigalitoday