Leta y’u Rwanda yihanganishije igihugu cy’u Buyapani nyuma y’umutingito ukomeye wabaye ku wa 01 Mutarama 2024 ku munsi w’u Bunani muri Perefegitura ya Ishikawa, ugahitana ubuzima bw’abaturage basaga 200 abandi bakaba baraburiwe irengero.

Kuri uyu wa Kabiri tariki 09 Mutarama 2024, Abayobozi bo mu Buyapani bagaragaje ko umutingito wabaye ku Bunani muri iki gihugu wahitanye abantu barenga 200, abarenga 100 baburirwa irengero, mu gihe abandi barenga ibihumbi 28 bakiri aho bahungishirijwe hadashyira uubuzima bwabo mu kaga.

Uyu mutingito wabaye muri iki gihugu wasenye inyubako nyinshi wangiza n’ibikorwa remezo binyuranye, mu mibare yagaragajwe n’ubuyobozi yerekana ko umubare munini w’abantu baburiwe irengero biganjemo abari batuye mu Mujyi wa Wajima uri mu yibasiwe bikomeye bitewe n’uyu mutingito.

Kugeza ubu abaturage batuye mu duce dutandukanye barenga ibihumbi 30 nta muriro w’amashanyarazi bafite, kubera iki kibazo cy’umutingito cyabaye muri iki gihugu.