Emmanuel NIRINGIYUMUKIZA Ihuriro ry’Ingabo za Repubulika Iharanira Demokarasi ya Congo (FARDC) rikomeje kugaba ibitero bikaze mu bice bituwe n’abaturage byinshi byafashwe n’Umutwe wa AFC/M23, bikaba bikomeje gutwara ubuzima bw’abaturage no kubatera guhunga.
Ku wa 7 Ukuboza 2025, FARDC yakomeje ibitero ku birindiro bibiri bya AFC/M23 biherereye mu isantere ya Masisi, muri Teritwari ya Masisi, Intara ya Kivu y’Amajyaruguru.
Amakuru aturuka muri ako gace avuga ko ingabo za FARDC zarashe ku birindiro biri ku Musozi wa Kahongole, uherereye mu cyaro cya Masisi, ndetse no ku bindi biri hafi y’ibiro by’ubutegetsi bwa Teritwari ya Masisi.
Abaturage bo mu isantere ya Masisi babwiye ACTUALITE.CD ko FARDC yakoresheje drone yabanje kuzenguruka hejuru y’aka gace mbere yo gutera ibisasu byayo ku birindiro by’AFC/M23.
Ibi bitero by’indege bikurikiye ibindi FARDC yagabye ku isantere ya Nyabiondo, na yo iherereye muri Teritwari ya Masisi. Nyabiondo ni ahantu h’ingenzi mu bijyanye n’ubwikorezi kuko iri ku marembo ya Walikale.
AFC/M23 yafashe ako gace ku wa 9 Werurwe 2025, ikahamburira imitwe ya APCLS na NDC-R yari iyafite.
Nyuma y’i Masisi na Nyabiondo, FARDC yongeye kurasa ku ngabo za AFC/M23 zari Bukombo, hagati ya Masisi na Nyabiondo.
Ihuriro ry’ingabo za RDC rirasa ibisasu byinshi mu bice bitandukanye by’Intara ya Kivu y’Amajyaruguru, mu gihe guhera ku wa 2 Ukuboza rikomeje gukora ibitero mu turere twa Kamanyola na Kaziba (Kivu y’Amajyepfo), aho abaturage bakomeje kwicwa, abandi bagakomereka, abandi bagahunga mu bwinshi.
AFC/M23 ikomeza kugenzura ibice byinshi byo muri Masisi na Rutshuru, ivuga ko ikomeje kurinda abaturage no kubarindira umutekano.
Ibitero FARDC ikomeje bikorwa ifashijwe n’u Burundi, bwinjiye ku mugaragaro muri iyi ntambara. Nyamara, nubwo bubishyiramo imbaraga nyinshi, abasirikare babwo nabo bakomeje kugwa ku rugamba.
Abasesenguzi bemeza ko AFC/M23 ikomeje kurwana ku muvuduko uri hejuru, ku buryo mu gihe ibintu bikomeje gutya, bishoboka ko Umujyi wa Uvira ushobora kugwa mu maboko yayo mu minsi mike iri imbere—aho Ihuriro ry’Ingabo za Leta ya RDC rimaze amezi 10 riryamiye nyuma yo kwirukanwa muri Bukavu.
