Fabos Fali 
Inzego z’ubuzima muri Uganda zatangaje ko zigiye gutangira kugerageza inkingo za Ebola nyuma y’uko iki cyorezo gihitanye umuforomo mu Mujyi wa Kampala.
Umuyobozi w’Ikigo cya Uganda gikora ubushakashatsi kuri Virusi, Prof Pontiano Kaleebu, yavuze ko abahanga mu bya siyansi bari gukora ubushakashatsi butandukanye bujyanye na dose z’inkingo za Ebola zirenga 2000 kugira ngo zitangwe mu guhangana n’iki cyorezo cyakomotse muri Sudani.
Ati “Turi gukora ibishoboka byose kugira ngo twihushe uburyo urukingo rwakwemererwa ko rwujuje ubuzirangenge. Kugeza ubu ntabwo ruremerwa.”
Ishami rya Loni ryita ku Buzima, OMS, ryagaragaje ko rishyigikiye Uganda mu bikorwa irimo byo guhangana na Ebola birimo no gutanga inkingo 2160 mu buryo bw’igerageza.
Ntiharamenyekana abakoze urwo rukingo na cyane ko kugeza ubu nta rukingo rwa Ebola yakomotse muri Sudani yishe umuforomo mu Bitaro byo mu Mujyi wa Kampala, ruremerwa.
Uyu muforomo yapfuye ku wa 29 Mutarama 2025, umunsi wakurikiyeho hatangazwa ko Ebola yateye icyo gihugu, ubu hakaba hari gushakishwa aho yaturutse.
Kugeza ubu hamaze kuboneka abantu 44 bahuye n’uwishwe na yo, barimo abakora kwa muganga n’abarwayi nk’uko Minisiteri y’Ubuzima muri Uganda ibivuga.
Ebola ikigaragara muri Uganda, OMS yatangaje ko yahise itanga miliyoni 1$ yo gufasha guhangana na yo ngo idakwirakwira mu bindi bihugu, ndetse iri gukorana n’inganda zikora inkingo ngo zoherezwe muri Uganda.
Uganda ifite inkingo za Ebola zitegerejwe kwemezwa kuva mu 2022, ubwo iki cyorezo cyagaragaraga na none muri iki gihugu kigahitana abantu 55 mu barenga 143 bari bacyanduye.
Fabos Fali 
