Mu makipe agomba kunyura mu mikino ya kamarampaka harimo ibigugu nka Real Madrid, Manchester City, Bayern Munich, Juventus ndetse na Paris Saint-Germain.

Yiyongeraho Atalanta, Borussia Dortmund, AC Milan, PSV, Benfica, Monaco, Brest, Feyenoord, Celtic, Sporting na Club Brugge.

Ni mu gihe Dinamo Zagreb, Stuttgart, Shakhtar Donetsk, Bologna, Crvena Zvezda, Sturm Graz, Sparta Prague, RB Leipzig, Girona, Salzburg, Slovan Bratislava na Young Boys zasezerewe.

Umunani yakomeje muri ⅛ ni Liverpool, Barcelona, Arsenal, Inter Milan, Atletico Madrid, Bayer Leverkusen, Lille na Aston Villa.

Ni umwaka wa mbere ubu buryo buri gukinwa muri UEFA Champions League nyuma y’aho amakipe yongerewe akaba 36.

Nyuma y’uko imikino y’iminsi umunani isanzwe irangiye, benshi bakomeje kwibaza uko imikino ya kamarampaka izakinwa ari nabyo tugiye kugarukaho muri iyi nkuru.

Amakipe azakina iyi mikino ni ayasoje hagati y’umwanya wa cyenda na 24, aho azakina ubanza hagati ya tariki 11 na 12 Gashyantare n’uwo kwishyura nyuma y’icyumweru.

Nubwo tombola nyirizina y’uburyo amakipe azahura iteganyijwe tariki 31 Mutarama 2025 ariko hari amakipe ari mu nzira imwe ndetse afite amahirwe yo kuzacakirana kubera imyanya yasorejeho.

Hagati ya Celtic na Manchester City imwe izahura na Real Madrid cyangwa Bayern Munich. Ni mu gihe izakomeza izahura hagati ya Atlético de Madrid na Bayer Leverkusen muri ⅛.

Hari kandi amahirwe menshi ko Juventus na Feyenoord imwe izahura na AC Milan cyangwa PSV Eindhoven.

Ni mu gihe kandi hagati ya Paris Saint-Germain na Benfica, imwe izahura na Brest cyangwa AC Monaco.

Muri ⅛ bihagaze bite?

Liverpool na FC Barcelone zabaye iza mbere ntabwo bishoboka ko zazahurira mu nzira uretse ku mukino wa nyuma.

Muri iyi mikino, The Cops izahura n’izava hagati ya PSG na Benfica cyangwa Brest na Monaco ari na ko bimeze kuri FC Barcelone.

Arsenal yasoje ku mwanya wa gatatu izahura n’izava hagati ya Feyenoord, Juventus, AC Milan cyangwa PSV Eindhoven.

Aston Villa yasoje mu makipe umunani ya mbere itahabwagamo amahirwe, izahura n’izava hagati ya Sporting Club de Portugal, Club Brugge, Atalanta cyangwa Borussia Dortmund.

Biteganyijwe ko imikino ya ⅛ izakinwa hagati ya tariki 4 na 5 Werurwe, mu gihe iyo kwishyura ari tariki 11 na 12 Werurwe 2025.

Icyakora, amakipe azamenya uko azahura muri tombola iteganyijwe tariki ya 21 Gashyantare.

Icyo gihe kandi ni bwo azamenya inzira azanyuramo kugera ku mukino wa nyuma, harebwa ikipe izegukana iki gikombe kiri gukinwa ku nshuro ya mbere hatangiye gukinwa ubu buryo bushya.