Mu cyumweru cyashize hadutse inkuru zigaruka kuri Munezero Aline cyangwa se Bijoux wamamaye cyane muri sinema nyarwanda, cyane izina rye rizamukira muri filime  zitandukanye zirimo ‘Bamenya’. Byari nyuma yo kumenyekana ko yaba yaratandukanye na Lionel Sentore bahoze bakundana, ndetse akaba yarabyaranye n’undi musore bakundana ubu.

Amakuru agaragaza ko Bijoux na Lionel Sentore basezeranye imbere y’Imana tariki 8 Mutarama 2022; nyuma yaho umubano wabo wajemo kidobya ndetse nyuma yo kubura ‘Visa’ y’uyu mugore ngo ajyane n’umugabo i Burayi, ahitamo kwigumira i Kigali. Mu mitegurire y’ibirori by’aba bombi habayeho ibindi birori byabanjirijwe no gusaba no gukwa, mu muhango wabereye kuri Golden Garden ku i Rebero. Gusezerana imbere y’Imana byabereye mu Itorero Anglican Paruwasi ya Remera, basezeranywa na Rev Dr Antoine Rutayisire. N’ubwo habayeho ibindi birori byose, mu minsi yashize InyaRwanda yahawe amakuru ko aba bombi batigeze basezerana imbere y’amategeko; ari nayo ntandaro yo kubura ‘Visa’ kwa Bijoux.

Inkuru z’uyu mukobwa ntizikunze kuvugwaho rumwe, kuko bamwe bamufata nk’udashobotse kandi agahinduranya abagabo nk’imyenda. N’ubwo nawe atari shyashya, ariko ni umuntu ugira umutima. Muribuka inkuru ye yaciye ibintu tariki 28 Kanama 2020, ubwo ku mbuga nkoranyambaga hacicikanaga amafoto ya Bijoux n’umusore witwa Abijuru Benjamin [King Bent] yamwambitse impeta ya fiançailles? Iyi niyo tugiye kugarukaho cyane muri iki nkuru, cyane ko ibyo mwabonaga bishashagirana byose bitari zahabu.

Inseko mwabonye ya Bijoux byari ukurenzaho kuko uriya musore yamutunguje impeta undi akaryumaho, akanga kuyanga ku karubanda imbere ya bagenzi be. Uko byagaragaye ku mbuga nkoranyambaga icyo gihe kuri Bijoux byari umunezero udasanzwe, ndetse yasutse amarangamutima ye yose, agaragaza ko Imana imushubije akaba agiye kwibonera umugabo. Ariko, byahe ko byari amaburakindi nyuma yo kubona amafoto ye yasakaye hose mu nshuti ze.

Abinyujije ku rukuta rwe rwa Instagram, Bijoux icyo gihe yagize ati “Uru rukundo ni inzozi, uri inzozi, igisubizo cy’amasengesho yanjye, uri ikimenyetso cy’ubwiza bw’Imana kuri njye. Nzarinda iyi mpano by’iteka. Nta wundi tuzamarana igihe cy’ubuzima nsigaje kuri iyi Si. Uri igice cy’ubuzima bwanjye, nshuti yanjye magara niteguye kubana nawe.” Nyuma y’amezi atatu yambitswe impeta ya fiançailles, Bijoux yagarutse mu itangazamakuru avuga izindi nkuru zatunguye benshi, cyane ko yemezaga ko yatandukanye n’umukunzi we agahita abona undi.

Ikintu kigaragaza ko uyu mukobwa yari yambitswe n’umuntu adakunda cyangwa kubyo nakwita nk’agahato. Icyo gihe mu kiganiro yagiranye n’ikinyamakuru Isimbi Tv, yavuze ko nyuma y’amezi 3 gusa yambitswe impeta y’urukundo yahise atandukana na Abijuru Benjamin wari umukunzi we, ndetse agahita abona undi. Ni inkuru yasakaye ku wa 23 Mutarama 2021. Yanze kuvuga icyatumye atandukana na Abijuru wari usanzwe atazwi cyane mu itangazamakuru, gusa avuga ko nk’abantu batari kubura icyo bapfa, ndetse bahisemo guhagarika urukundo rwabo uyu mukobwa akamusubiza impeta.

Uyu mukobwa yavugaga ko yari yafashe umwanzuro wo kwerekana umukunzi we kuko yari afite gahunda yo kubaka, ariko bikaba bitaragenze neza. Muri icyo kiganiro ni naho yahise atangaza ko yishumbushije undi musore nawe nyuma batandukanye, akaza kwambikwa indi mpeta na Lionel Sentore mu Ukuboza 2021. Hari amakuru avuga ko impamvu iby’urukundo rwa Bijoux na Abijuru Benjamin bitarambye ari uko n’ubundi we n’uyu musore batari baziranye cyane, ahubwo Bijoux yatunguwe nawe akamwambika impeta undi aho kugira ngo asebye ‘undi mwana’ akabyemera.

Uyu mukobwa ngo inkuru yabaye kimomo abuze uko agira nawe arabipostinga, ndetse atangira no kugerageza gushaka uko yakwiyumvamo mugenzi we bari bagiye kujya mu rugendo rwo gushakana ariko biramunanira. Uwaduhaye amakuru yagize ati ‘‘Bijoux yabaye nka wa musamariya ujya uvugwa muri Bibiliya. Yari azi ko birahita birangira yemera kwambara impeta, nyuma bimubana ibindi. Gusa yanze gusebya inshuti. Ikibazo ni uko n’ubundi ibyabo byanze burundu.’’ Yakomeje avuga ko uretse kutagenda bahuza ku tuntu tumwe na tumwe nk’abantu, bari batangiye gukundana bya nyabyo bibatunguye.

Indi mpamvu yatumye batandukana ari ukuba Abijuru yarafuhiraga cyane Bijoux, undi yibutse ko yamwambitse impeta atabishaka ahitamo gukuramo impeta arayimusubiza; atangira ubundi buzima bushya. Bijoux mu minsi yashize aheruka kwibaruka umwana w’umuhungu, hari n’amakuru avuga ko yatangiye ubuzima bushya mu rukundo n’undi musore mushya. Lionel Sentore wari warushinze na Bijoux, we aheruka kuza mu Rwanda abajijwe inkuru z’uyu mugore zirimo iz’uko yibarutse yiraza I Nyanza avuga ko atazi akanunu kazo, ndetse ari bwo bwa mbere yumvise iyi nkuru mu matwi ye. source: inyarwanda

Mu gutungurwa kwinshi Lionel Sentore yavuze uko yatunguwe no kumva umugore we Bijoux yarabyaye anatungura abantu ubwo yavugaga ikimuzanye mu Rwanda.