Irushanwa ry’amagare ryatangiye kuwa 19 gashyantare 2023 kari kitabiriwe n’abakinnyi 93 bahagarariye ibihugu byabo 28, ryatangiriye mu mugi wa Kigali berekeza mu karere ka Rwamagana. aha twabakusanyirije uko umunsi ku w’undi irushanwa ryagenze kuva ku munsi wa mbere kugeza kuri uyu munsi wa karindwi aho abakinnyi bagarutse i Kigali.

AGACE KA MBERE: Umwongereza Ethan Vernon ukinira Soudal-QuickStep ni we wegukanye agace ka mbere ka Tour du Rwanda 2023 aho yakoresheje ibihe bimwe n’umunyarwanda Mugisha Moise wa Team Rwanda wabaye uwa 21. Abasiganwaga uyu munsi ubwo hakinwaga agace ka mbere ka Tour du Rwanda 2023 bahagurukiye kuri Kigali Golf Resort &Villas mu gihe isiganwa ryasorejwe i Rwamagana nyuma yo gukora intera y’ibilometero 115,6.

Abakinnyi 93 (benshi mu mateka y’iri risagnwa) bitabiriye isiganwa ry’uyu mwaka bavuye Kigali Golf berekeza kuri Utexrwa- Yamaha- Nyabugugo- Gatsata- Nyacyonga- Gasanze- Batsinda- Kagugu- mu Kabuga- Kibagabaga- Kimironko- mu Nganda- 15- 19- Masaka- Kabuga- Rwamagana. Abakinnyi bageze i Rwamagana kuri Dereva Hotel ahasorezwa isiganwa, bazengurutse inshuro eshanu intera ya kilometero 6.4.

AGACE KA KABIRI: Umwongereza, Ethan Vernon wegukanye agace ka mbere ka Tour du Rwanda 2023 ni na we wongeye kwegukana agace ka kabiri k’iri siganwa kasorejwe Gisagara ni mu gihe Muhoza Eric ni we munyarwanda waje hafi. Agace ka Kabiri ka Tour du Rwanda 2023, abakinnyi bahagurukiye muri Kigali Free Zone berekeze UTC- Muhima- Yamaha- Nyabugogo- RN1- Ruyenzi-Kamonyi- Muhanga- Nyanza- Huye- SP Station- Casa Hotel- Ndora- Gisagara Arena. Abasiganwa bakoze ibilometero 132,9.

AGACE KA GATATU: Umunya-Eritrea Henok Mulueberhane ukinira ikipe ya Green Project Bardiani ni we wegukanye agace ka 3 k’irushanwa rya Tour du Rwanda. Mulueberhane yashoje aka ku mwanya wa mbere w’aka gace Huye –Musanze kareshyaga na km 199.5. Yakoresheje 2h13min37 sec anahita yegukana wa mupira w’umuhondo wari ufitwe n’Umwongereza Ethan Vernon ukinira ikipe ya Soudal Quick Step.

AGACE KA KANE: Umufaransa, Thomas Bonnet ukinira ikipe ya Total Energies yegukanye agace ka Kane ka Tour du Rwanda 2023, abasiganwa bavaga i Musanze berekeza i Karongi, ku ntera ya Kilometero 138,3. Bonnet w’imyaka 24, ni we wahise yambara umwenda w’umuhondo kuko yari amaze gukoresha amasaha 14, iminota 40 n’amasegonda 33, arusha amasegonda 20 Henok wabaye uwa gatanu kuri iyi nshuro.

AGACE KA GATANU: Umunya-Afurika y’Epfo Ormiston Callum ukinira Ikipe y’Igihugu yegukanye Etape ya Gatanu akoresheje amasaha ane, iminota 59 n’amasegonda 51. Umwambaro w’umuhondo ufatwa na Lecerf William Junior. Iri siganwa mpuzamahanga ry’amagare riri kuba ku nshuro ya 15, ryari rikomeje ku munsi waryo wa gatanu ahari gukinwa Etape yahagurukiye i Rusizi yerekeza i Rubavu ku ntera y’ibilometero 195,5.

Iri rushanwa ry’uyu munsi ryayobowe na Chris Froome igihe kinini ariko agira ikibazo cy’igare rye ryagize ikibazo kabiri baramufata. Mbere y’uyu munsi yari ku mwanya wa 21 ku rutonde rusange asigwa 1’08’’ na Thomas Bonnet ariko ntiyahiriwe. Chris Froome nta siganwa aratwara kuva mu 2018 ubwo aheruka gutwara Giro d’Italia muri uwo mwaka. Nyuma y’agace ka Gatanu ka Tour du Rwanda 2023, umubiligi William Junior Lecerf w’imyaka 20, niwe wambaye umwenda w’umuhondo. Umunyarwanda uza hafi yari Muhoza Eric uri ku mwanya wa Karindwi, arushwa amasegonda 11″ n’uwa Mbere.

AGACE KA GATANDATU: Matteo Badilatti wo mu Busuwisi niwe wegukanye agace ka Gatandatu ka Tour du Rwanda, kavaga i Rubavu kerekeza i Gicumbi ku ntera ya 157Km. Kuri uyu wa Gatanu tariki 23 Gashyantare 2023, nibwo isiganwa rya Tour du Rwanda ryakomereje mu Karere ka Rubavu basoreza mu Karere ka Gicumbi. Abakinnyi bahagurukiye ahazwi nka home of Amstel berekeza i Gicumbi ku ntera ya Kirometero 157. Aka gace ka gatandatu karangiye kegukanwe n’umusuwisi Matteo Badiatti. Ni ku nshuro ya mbere Umusuwisi yari yegukanye agace ka Tour du Rwanda kuva mu 2017. Matteo asanzwe akinira ikipe ya Q36.5 Pro.

AGACE KA KARINDWI: Umutaliyani Manuele Tarozzi niwe wegukanye agace ka karindwi ka Tour du Rwanda katangiriye i Nyamata mu Karere ka Bugesera, gasorezwa mu Mujyi wa Kigali. Iyi Etape ya Nyamata-Mont Kigali, ibanziriza iya nyuma, yareshyaga n’ibilometero 115,8. Umutaliyani Manuele Tarozzi ukinira ikipe ya Green Project-Bardianic yatsinze nyuma yo kuzamuka kwa Mutwe ari uwa mbere.

Abanyarwanda babiri Hakizamana (May Stars) na Nsengimana (Team Rwanda) bayoboye isiganwa ry’ uyu munsi igihe kirekire ariko ntibabasha kuzamuka Mont Kigali ari aba mbere . Umunya-Eritrea Henok Mulueberhane ni we wongeye kwambara umwambaro w’umuhondo, arusha Umunyarwanda Muhoza Eric amasegonda umunani gusa. Umunyarwanda uza hafi ku rutonde rusange ni Muhoza Eric wa gatandatu aho arushwa amasegonda umunani gusa, bimuha amahirwe yo guhatanira gutwara Tour du Rwanda izasozwa ku Cyumweru, tariki ya 26 Gashyantare 2023, hakinwa Agace ka Munani kazabera i Kigali ku ntera y’ibilometero 75,3.