Umugabo witwa Gisa Nduwayo wo mu karere ka Gicumbi mu murenge wa Byumba, afungiye kuri sitasiyo ya RIB ya Byumba akurikiranweho gukubita umwana we w’umuhungu w’imyaka umunani bikamuviramo urupfu. Ni mu mudugudu wa Gatare akagali ka Gisuna.

Urupfu rw’uyu mwana rwamenyekanye kuwa 14 Ugushyingo 2023, nyuma y’uko umwana yari yagiye ku ishuri ubuyobozi bw’aho yiga bukamubonana inkovu z’inkoni n’imvune, bukamwoherereza ababyeyi be ngo bajye kumuvuza.

Nk’uko byemezwa na Ngezahumuremyi Theoneste, Umuyobozi w’umurenge wa Byumba, bivugwa ko uyu mwana yagiye ku ishuri kuri G.S Gacurabwenge aho yigaga, abarezi babona afite inkovu z’inkoni ku maboko, ndetse yavunitse n’akaboko bamubaza icyo yabaye, akababwira ko akubitwa na Se umubyara afatanije na Mukase babana mu rugo.

Uyu mwana yavuze ko bamukubita mu masaha ya nimugoroba barimo kumwigisha. Ubuyobozi bw’ishuri icyo gihe bwahise butumaho Se w’umwana bumusaba kujya kumuvuza, ahabwa imiti, mu gitondo bagiye kumuha indi miti basanga yapfuye.

Uyu mwana yigaga mu karere ka Gatsibo nyuma nyina umubyara amwoherereza Se ngo amurere muri Gicumbi.