Umugabo witwa Nsengiyumva Jean Paul wo mu karere ka Musanze mu murenge wa Busogo, kuwa 24 Ukakira 2023 mu ijoro yagize amakenga y’imyaka ye y’ibirayi iri mu murima ajya kuyicunga, agezeyo ahahurira n’abajura. Ubwo abo bajura bari mu murima biba ibirayi bari bitwaje intwaro gakondo zirimo n’imihoro.

Abo bajura bakimara kubona nyiri umurima aje, baramurwanyije bamukomeretsa ku gahanga, atabaje uwitwa Habimana wari uje kumutabara bamutema mu kiganza. Nsengiyumva yahise ajyanwa kwa muganga mu kigo nderabuzima cya Busogo akaba ari kwitabwaho n’abaganga ndetse ari no koroherwa nk’uko Gitifu wa Busogo Ndayambaje Augustin yabibwiye Kigali Today.

Gitifu yavuze ko Nsengiyumva bamuteye ibuye ku mutwe akaba ari ryo ryamukomerekeje bahita biruka, ndetse mu gushaka abakoze ubwo bujura bakaba hari n’abo bafashe. Mu makuru yaturutse mu baturage, abafashwe basanzwe harimo abaturuka mu biyise Ibihazi basanzwe bambura abantu, hakaba harimo n’umaze kujyanwa mu Igororero (Transit center) rya Kinigi inshuro enye.