Umugabo witwa Ndagijimana Daniel w’imyaka 28 y’amavuko, wo mu Mudugudu wa Karimba mu Kagari ka Raranzinge mu Murenge wa Rusenge mu Karere ka Nyaruguru. Byamenyekanye ko yapfuye bitunguranye aguye mu murima bikekwa ko yari mu bikorwa by’ubujura, umurambo we wagaragaye mu kabande mu gitondo cyo kuri uyu wa 05 Ukuboza 2023.

Abaturage babonye uwo murambo bakeka ko yari agiye kwiba ibijumba muri uwo murima gusa Urwego rw’Iguhugu rw’Ubugenzacyaha (RIB) ikaba yatangiye iperereza. Umunyamabanga Nshingwabikorwa w’Umurenge wa Rusenge, Umuhoza Josephine, yabwiye itangazamakuru ko uriya muntu yapfuye ariko batamenye uko byagenze byabazwa Umuyobozi w’Akarere ka Nyaruguru kuko ni we uvugira akarere.

Umuyobozi w’Akarere ka Nyaruguru, Murwanashyaka Emmanuel, abajijwe iki kibazo yavuze ko hatangiye iperereza. Yagize ati” Umurambo wabonetse wajyanywe mu Bitaro bya Munini. RIB iri mu iperereza ngo hamenyekane uko byagenze”.