Umugabo wo mu karere ka Musanze, aravugwaho kuruma urutoki rw’umugore we kubera kumufuhira, ndetse no kumukubita amabuye mu mutwe agamije kumuvutsa ubuzima. Ni umugore witwa Mukandutiye Vestine wo mu mudugudu w’Akumugeni, akagali ka Buramira, Umurenge wa Kimonyi ushinja umugabo we Nshimiyimana Jean Claude.

Ubwo yaganiraga na Radiotv10, Mukandutiye yavuze ko yahohotewe n’umugabo we kubera ko yamubonanye n’undi mugabo akamufuhira. Yagaragaje urutoki umugabo we yarumye n’amenyo, avuga ko yarurumye bavuye mu bukwe kubera ifuhe.

Uyu mugore yakomeje avuga ko nyuma y’aho amurumye urutoki, kuwa 29 Kamena 2023 nabwo yamukubise bikomeye amuziza ko amubonanye n’undi mugabo. Abaturanyi be bavuga ko uyu mugore amaze igihe kinini ahohoterwa bityo hagira igikorwa atarahasiga ubuzima.

Mukansano Godence, umunyamabanga nshingwabikorwa w’umurenge wa Kimonyi, yagiriye inama uyu mugore kugaragaza ikibazo cye mu nkiko kugira ngo umugabo we akurikiranwe. Amakuru avuga ko uyu mugabo akimara guhohotera umugore we yahise atoroka kugira ngo adakurikiranwa. Habarurwa imiryango 76 ibana mu makimbirane muri uyu murenge.