Umugabo witwa Denis Mfumbulwa utuye mu gace ka Goba Kulangwa mu Mujyi wa Dar es Salaam, watawe muri yombi, kuri ubu yagejejwe mu nkiko ashinjwa kunanirwa kwishyura fagitire ya Serena Hotel ishami ryo muri iki gihugu, ihwanye n’Amashilingi 21,491,866.97 (arenga miliyoni 10Frw).

Mu ntangiriro z’iki cyumweru nibwo uyu mugabo yagejejwe mu Rukiko rw’Ibanze rwa Kariakoo. Ashinjwa kuba yararaye ndetse anarya muri iyi hoteli kuva tariki 6 Werurwe mu 2022 kugeza ku wa 28 Werurwe mu 2024, ariko ntiyishyure kugeza umwenda we ugeze kuri kariya kayabo.

Dosiye y’uyu mugabo igaragaza ko nyuma yo kumara igihe kingana gutya muri iyi hoteli iherereye mu gace ka Ilala, yaburiwe irengero ubwo yari agiye kwishyuzwa.

Uregwa yahakanye ibyo ashinjwa byose, ahubwo asaba kurekurwa akaburana ari hanze. Mu gihe Umucamanza yahise asaba uyu mugabo gushaka abantu babiri batanga ingwate ingana na miliyoni 20 z’Amashilingi kugira ngo arekurwe, gusa arababura biba ngombwa ko akomeza gufungwa.