Fabrice Nahimana Umugenzi w’umugore ukomoka muri Angola yapfiriye mu ndege ya TAAG Angola Airlines ubwo yari mu rugendo rwerekeza i Maputo muri Mozambique ku wa Gatandatu, tariki ya 8 Ugushyingo.
Urupfu rwe rwemejwe nyuma y’uko indege yari imugejeje i Maputo.
Mu itangazo ryasohowe n’iyi kompanyi y’indege, hagaragajwe ko habayeho “Ikibazo cyihutirwa cy’uburwayi bw’umugenzi” wari uturutse muri Angola, akaba yari aherekejwe n’umugabo we.
Iri tangazo rivuga ko “bamaze kubona ko umugenzi afite ikibazo cy’ubuzima, abakozi b’indege bahise bakora ibishoboka byose bamuha ubufasha bw’ibanze, ndetse bahita bamenyesha ko hakenewe abaganga biteguye kumwakira bageze ku kibuga cy’indege.”
Ubwo indege yageraga i Maputo, inzego z’ubuvuzi za Leta ya Mozambique “zahise zisuzuma zemeza ko uwo mugenzi yapfuye.”
Nyuma y’aho, inzego z’ubuzima zo ku kibuga cy’indege hamwe n’abashinzwe iperereza bahise batangira gukusanya ibimenyetso kugira ngo hamenyekane icyateye urwo rupfu.
Iyi kompanyi y’indege yavuze ko “nyuma y’uko inzira zose zemewe n’amategeko zirangiye, indege yahise isukurwa kandi isukurwa hakurikijwe amabwiriza y’isuku n’umutekano w’indege.”
TAAG Angola Airlines yihanganishije byimazeyo umuryango n’inshuti z’uwo mugenzi.
