Abantu bakunze kuvuga ko abazimu babaho ndetse ko n’amarozi abaho, ariko ibi ntibivugwaho rumwe kuko hari abavuga ko bitabaho. Bavuga ko uwapfuye adashobora kugaruka ku isi. Nyamara umugore wo muri Liberia avuga ko yakubise umuzimu mu nzozi, yabyuka agasanga ikiganza cyuzuyeho amaraso cyishushanyije ku nda ye.

Inkuru dukesha ikinyamakuru Intel Region ivuga ko abatuye mu ntara ya Grand Cape Mount muri Liberia, baguye mu kantu nyuma yo kumva inkuru y’umugore ukiri muto utwite avuga uburyo yasanze igiganza cyishushanyije ku nda ye ari no kuva amaraso. Ibi byabaye mu gitondo nyuma y’aho yari yaraye akubise urushyi umuzimu mu nzozi.

Mu kiganiro n’umunyamakuru ejo ku wa Kane tariki ya 30 Mutarama 2025, uyu mugore yavuze ko mu ijoro ryakeye, yarose inzozi ziteye ubwoba aho yabonaga umugore atazi,uteye ubwoba kandi umemze nk’umuzimu mu nzozi, aza amusanga ashaka kumu kuramo inda ngo amutwarire umwana.

Mu gushaka kwirwanaho, uyu mugore yakubise urushyi rudasanzwe uyu muzimu mu nzozi kugira ngo awirukane, ibi yabisobanuye agira ati “Narose umugore uteye ubwoba, aje kuntwarira umwana, niko kumukubira urushyi nirwanaho. Ariko nkikanguka,inda yanjye yari yishyushanyijeho ikiganza, habyimbye nk’aho ari urushyi nakubishweho”

Uyu mugore kandi yanavuze ko yabyutse akumva ari kubabara cyane ku nda, yarebaho agasanga aho hishushanyije ikiganza, wagira ngo hari uwamushwaratuye kuko ngo yari ari kuva amaraso, anaribwa.

Kubera ubwoba no gushaka kubungabunga umutekano we, umuryango we wamujyanye ku ivuriro riri hafi aho kugira ngo abe yitabwaho n’abaganga cyane cyane ko atwite.

Mu gihe abaganga bataratanga ibisobanuro bya siyansi bisobanura ibyabaye kuri uwo mugore, abaturage benshi bemeje ko ari igitero cy’amadayimoni cyabikoze, ndetse banavuga ko mu gihe uwo mugore adahagurukiye gusenga n’ubundi azakomeza kumutera.