Fabos Fali Nk’uko amakuru abitangaza, umugore wa Baltasar Ebang Engonga, yikubise hasi agwa igihumure maze ajyanwa kwa muganga. Amakuru yemeza ko uyu mubyeyi usanzwe ari umunyamahoro, yananiwe kwihangana maze araturika ararira nyuma yo kubona amashusho arenga 400 agaragaza umugabo we mu mibonano mpuzabitsina n’abagore batandukanye.
Aya makuru avuga ko yajyanywe kwa muganga hafi yaho atuye, ubu ari kwitabwaho nabaganga mu gihe ataragarura ubwenge ndetse akaba atabasha kuvuga.
Nubwo amakuru y’ubuzima bwite bwa Madamu Ebang Engonga agirwa ibanga, yavukiye kandi akurira muri Guinea Equatoriale. Yarangirije amasomo ye muri Kaminuza ya Birmingham nyuma yo kujya mu Bwongereza, ari na ho yahuriye n’umugabo we. Batangiye gukundana mu mwaka wa 2004, maze basezerana kubana akaramata mu 2009.
Uyu muryango ufite abana batandatu. Kuva yashakana na Baltasar Ebang Engonga, Madamu Ebang Engonga yagiye agaragaza urukundo no kwitangira uyu munyapolitiki, ndetse akaba ari umubyeyi mwiza uhora asengera abana babo.
Ayo mashusho arenga 400 yasakaye ku mbuga nkoranyambaga kuva mu mpera z’icyumweru gishize nyuma yo gutabwa muri yombi kwa Baltasar Engonga umuyobozi mukuru w’ikigo cya leta gishinzwe iperereza (National Financial Investigation Agency), akekwaho ibirego bitandukanye n’aya mashusho.
Gukwirakwira kwayo kwatumye visi perezida w’iki gihugu asaba abagenzura n’abatanga serivisi za internet mu gihugu guhagarika gukomeza gukwira hose kwayo.
Amakuru avuga ko ayo mashusho yabanje gukwirakwira muri ‘groups’ za WhatsApp nyuma agera kuri Facebook, Instagram, TikTok na X.
Ayo mashusho yageze kuri izo mbuga mu gihe Baltasar yari afungiye muri gereza ya Black Beach yo ku murwa mukuru Malabo ku bindi byaha akekwaho, nk’uko bivugwa n’ikigo cya leta cy’itangazamakuru TVGE.
Fabos Fali 