Ku mugoroba wo kuwa 27 Kanama 2023 nibwo umuhanzi Muneza Christopher yahagurutse ku kibuga cy’indege, I Kanombe yerekeza muri Amerika aho agiye gukorera ibitaramo, icyakora akaba amaze kwemeza ko azakora ibitaramo bitatu gusa bigateganwa ko azazenguruka muri Leta esheshatu.

Byitezwe ko kuwa 2 Nzeri 2023 Christopher azataramira mu mujyi wa Portland mu gihe kuwa 9 Nzeri 2023 azataramira mu mujyi wa Loiusville naho kuwa 23 Nzeri 2023 ataramire mu mujyi wa Phoenix. Nubwo hamaze kwemezwa ibitaramo bitatu azakora ariko hari ibindi byitezwe ko ari mu biganiro kuburyo bizagera kuri 6.

Christopher yavuze ko yiteguye gutanga ibyishimo ku bakunzi b’umuziki batuye muri Leta zunze ubumwe z’Amerika. Ati “hariya haba hari abantu benshi, hari ababa badaherutse kubona dutarama, nanjye mba nkumbuye kuririmbira abantu tuba tudaherukanye. Iki nicyo gihe ngo twishimane kandi ndabyizeye.”