Jose Chameleone yatangaje ko yababajwe na Bobi Wine wanze kwitabira igitaramo ‘Gwanga Mujje’ aherutse gukora, mu gihe yari akeneye ko amutera inkunga ndetse akanamugaragariza urukundo nyuma y’ibibazo yahuye na byo.

Uyu muhanzi yavuze ko n’ubwo atigeze abana neza na Bobi Wine kubera ibibazo bya politiki, yamusuye mu bitaro bya Nsambya ubwo yari yarakubitiwe n’abakomando ba SFC muri Gulu. Chameleone avuga ko yasuye Bobi nk’umuvandimwe ndetse no kugira ngo bubake ubushuti bw’igihe kirekire dore ko bamaze imyaka myinshi bahurira mu ruganda rwa muzika.

Nk’uko ikinyamakuru Mbu kibitangaza, Chameleone yabajije Bobi Wine uko yakwiyumva aramutse yisanze mu bihe nk’ibyo ndetse n’inshuti ze na zo ntizibashe kumuba hafi. Kuri icyo kibazo, avuga ko Bobi Wine atagaragaje umutima wa kimuntu nk’uko ahora avuga ko arwanira inyungu za rubanda nyamwinshi. Chameleone ubu arasaba Bobi Wine ko ubutaha yazikosora, kugira ngo ntazongere gukora amakosa nk’iri. src: Bwiza