Umuhinde w’umunyamuziki akanatunganya indirimbo witwa Vijay Kumar Garg, akaba akoresha amazina ya Vijay yatangiye urugendo rwo gutanga umusanzu mu muziki ashyiraho itafari aho yinjiye mu isoko ry’umuziki nyarwanda kumugaragaro agamije kuwuteza imbere. Uyu muhanzi yahise akorana indirimbo n’umuhanzi ugezweho muri iyi minsi ‘Afrique’.  Mama Nick agiye kubagwa kubera impanuka aherutse gukora

Uyu muhanzi yatangarije Inyarwanda ko yatangiye umuziki ari umwana ariko akaza kuwushyiramo imbaraga nyinshi no kuwitaho bihambaye bya kinyamwuga nyuma, yavuze ko umuziki umushimisha akaba ariyo mpamvu yawuhinduye umwuga we.

Uyu muhanzi yatangaje ko kubera ko akunda u Rwanda ariyo mpamvu yashatse kwinjira mu muziki nyarwanda mu rwego rwo kuwuteza imbere, akaba yahise akorana indirimbo bise ‘Oya’ na Afrique. Yatangaje ko n’impamvu ashaka gukomeza gukora umuziki nyarwanda ari uko akunda kubyina mu tubyiniro.

Yavuze ko nta muhanzi wihariye ashaka gukorana na we mu Rwanda ahubwo azakorana na buri wese bizakundira igihe yaba abonye ayo mahirwe, ndetse anavuga ko yifuza kumenyekana mu muziki nyarwanda, agakundwa na buri wese kandi agakora indirimbo nyinshi mu muziki nyarwanda.

Uyu muhanzi yatangaje ko mu myaka 5 iri imbere ashaka kuzaba ari mu bahanzi bakunzwe haba mu Rwanda ndetse n’iwabo mu buhinde ari nayo mpamvu ashaka gutanga ibitekerezo bishya mu muziki nyarwanda anazana byinshi bishya. Yakomeje avuga ko yifuza kumenya igishoro cy’umuziki na filime nyarwanda ari nako ashaka kubona uruganda rw’umuziki rukura nk’izindi zizwi ku isi.