Umuhungu wa Perezida wa Somalia, Mohammed Hassan Sheik yahamijwe n’Urukiko icyaha cyo kwica bidaturutse ku bushake umugabo wakoraga akazi ko gutwara ibintu kuri moto. Nyuma y’uko agongeye uyu mumotari muri Intanbul muri Turkey ubwo yari atwaye imodoka bikarangira uwo mumotari apfuye.

Urukiko rwategetse ko ahanishwa igifungo cy’imyaka 2 n’igice, ariko ngo icyo gifungo ntazagikora kuko yatanze amande ya 910 USD. Nyamara ibi ntibyakiriwe neza n’abaharanira inyungu z’abatwara moto muri Turkey bavuga ko Urukiko rwabogamye ndetse ngo biteguye kujurira iki cyemezo.

Aba bareberera inyungu z’abamotari bashinja Leta ya Turkey kugira umubano wihariye na Somalia, bakavuga ko iyo aba ari undi wakoze iki cyaha atari uyu muhungu wa Perezida wa Somalia yari guhanishwa ikindi gihano kitari iki bari kuvuga ko cyoroshye.

Ibi bashingira ku kuba uyu mugenzi wabo yaragonzwe agahita apfa ndetse uyu muhungu wa Perezida agahita ahunga igihugu akagaruka aje kwitaba Urukiko. Perezida wa Somalia aherutse kuvuga ko umuhungu we atigeze ahunga ndetse ko yamugiriye inama yo gusubira Instabul ngo yiregure ibyo aregwa.

Kuva mu mwaka wa 2011 Turkey ifitanye umubano mwiza na Somalia ku rwego bafitanye ikigo cya gisirikare gitanga imyitozo ku basirikare n’abapolisi muri Somalia.