Ubushinjacyaha bwo muri Koreya y’Epfo bwasabye ko O Yeong-su, umukinnyi wa filime w’imyaka 80 wamamaye muri Squid Game, ahanishwa igifungo cy’umwaka umwe, mu rubanza rw’ubujurire ashinjwamo ihohotera rishingiye ku gitsina.

Yabisabiwe ku wa 4 Mata 2025, mu ishami rya Seongnam ry’Urukiko Rukuru rwa Suwon, aho ubushinjacyaha bwavuze ko igihano yari yahawe mbere cyari gito.

Uyu musaza yari yarakatiwe amezi umunani y’igifungo gisubitse mu myaka ibiri, anategekwa kwitabira amasomo y’amasaha 40 yerekeye kwirinda ihohotera rishingiye ku gitsina.

O yajuririye icyo cyemezo asaba kugirwa umwere, mu gihe ubushinjacyaha bwo busaba ko igihano kigumaho, ahubwo kikongerwa. Ibyaha aregwa bivugwa ko byabaye mu 2017, aho ashinjwa gukorakora no gusoma ku gahato umugore bari mu itsinda rimwe ry’ikinamico.

Ubushinjacyaha buvuga ko uwo mugore yigeze kumuha amahirwe yo gusaba imbabazi ariko ntiyabikora ndetse kugeza n’ubu ataragira icyo yicuza. Abamwunganira mu mategeko bo bavuga ko ibimushinjwa bishingiye gusa ku buhamya bw’uwo mugore n’ubutumwa yohereje, bakavuga ko budafite gihamya ihamye.

Mu ijambo rye, O Yeong-su yavuze ko yumva ari igisebo kuba ageze mu rukiko afite imyaka 80, ashimangira ko atemera ko ibyo yakoze ari icyaha, nubwo yiteguye kubiryozwa nibiba ngombwa.

Urukiko ruzasoma umwanzuro wa nyuma ku wa 3 Kamena 2025.