Nyuma y’uko Alliah cool asohoye agace gato ka filime ari guteguza abakunzi be, ikintu cyavuzweho cyane ni amashusho yagaragayemo umusore n’umukobwa barimo gukora imibonano mpuzabitsina. Umukobwa wagaragaye ari gukora imibonano mpuzabitsina yitwa Alice la Boss, akaba umunyamideri winjiye muri sinema nyarwanda.

Ubwo yabazwaga kuri aya mashusho yagaragaye ameze nk’uri gukora imibonano mpuzabitsina, Alice yabwiye IGIHE ko uretse ibyo bakinnye mu rwego rwo kugaragaza ibitekerezo byanditse muri filime, ariko ntago bigeze bakora ibyo abantu batekereje ko baba barakoze imibonano mpuzabitsina cyane ko ibyo Atari ibintu bari gukorera imbere ya camera cyangwa imbere y’abari bahari filime ifatwa.

Yagize ati “Nta kibazo byigeze bintera kuko ni ibintu bisanzwe, nibaza ko umuntu wese uzi ubwenge atabifata nk’aho twari turi gukora imibonano mpuzabitsina kuko ntabwo byabera hariya.” Alice la boss yavuze ko uretse abantu bo ku imbuga nkoranyambaga, ariko abantu be ba hafi batigeze bamubaza byinshi, cyane ko abantu benshi babizi ko bitakunda ibyo bintu kubikorera ahantu nka hariya.

Iyi filime nshya ya Alliah cool yitwa ‘Good book bad cover’ igiye kujya hanze ikurikira iyo yise Alliah the movie yashyize hanze mu mpera z’umwaka wa 2021, ikazasohoka hategerejwe indi yiswe ‘Accidental vacation’ yahuriyemo n’abakinnyi bakomeye barimo n’abo muri Nijeriya. Ni filime mpuzamahanga kuko mu gace kasohotse humvikanyemo indimi z’icyongereza n’igiswahili, Alliah akaba avuga ko iri hafi kuko imirimo yo kuyitunganya iri ku mpera.