Umwangavu w’imyaka 17 y’amavuko witwa Eden Lewis ukomoka ahitwa Oakdale, Caerphilly, South wales, ageze kure imyiteguro y’ikiriyo cye ndetse akaba yaramaze no kugura ikanzu azambara yapfuye. Uyu mukobwa wugarijwe na cancer yo mu magufa, yavuze ibintu by’ibanze agomba gukorerwa ku munsi azaba yapfuye.

Mu gutegura uko umuhango wo gushyingurwa uzaba umeze, lewis yamaze gushaka isanduku azahambwamo ndetse ategura n’indirimbo bazamushyingura baririmba ku munsi we wa nyuma. Ikinyamakuru dailymail.co.uk dukesha iyi nkuru cyatangaje ko nubwo lewis azi ko iminsi ye ibarirwa ku ntoki, ariko we aracyakomeje inzozi ze yifuje kuva kera, kwiga kaminuza, gusomana bwa mbere ndetse no kujya mu gitaramo kureba umusitari we akunda witwa Harry Styles.

Kubera kwiheba, Lewis yanyweye itabi ryinshi cyane aho amenyeye ko atazakira iyi ndwara abibwiwe n’abaganga, ndetse uko yakomeje kuvurwa niko ibintu byagiye biba bibi kurushaho. Lewis avuga uko yiyumva kuba indwara arwaye ituma atajya mu rungano rwe, yavuze ko inshuti ze ziri ku ishuri, mu gihe we ari kwa muganga, abo bangana bafite abakunzi mu gihe we afite imiti anywa kandi bizwi ko itazamukiza.

Lewis yasabye ko urupfu nirumara kumutwara agomba kuzashyingurwa mu mabara y’abatinganyi. Avuga ko impamvu ari uko yavuriwe mu ivuriro ry’umuryango LGBTQ bityo nubwo atazakira ngo abiture ineza bamugiriye, bazamuherekereshe amabara y’uyu muryango.