Mu Cyumweru gushize ku wa Mbere tariki 27 Ugushyingo 2023, umukozi w’Imana Harelimana Joseph wamamaye nka Apotre Yongwe yari yajuriye ku cyemezo cyo gufungwa by’agateganyo, yifuza kurekurwa. Kuko yari yabwiye Urukiko Rwisumbuye rwa Gasabo ko urw’Ibanze rwamufatiye icyemezo cyo gufungwa by’agateganyo, hari ibyo rwirengagije. Urukiko rwemeje ko azakomeza gufungwa.

Yongwe akaba ashinjwa ibyaha birimo kurya amafaranga y’abantu abatekeye umutwe, nyamara we abihakanira kure kuko avuga ko yabaga ari amaturo bamuha kandi ko kuba ibyo yabasengeraga bitabaye ibyo ntiyabibazwa kuko Atari Imana. Uregwa n’Umunyamategeko we bavuga ko akwiye gufungurwa agakurikiranwa ari hanze, kuko ibyatangajwe n’ubushinjacyaha bitagize impamvu zikomeye zatuma akurikiranwa.

Nubwo bimeze gutya kandi Ubushinjacyaha bwo buvuga ko ibyagezweho mu iperereza bihagije kuba uregwa yakurikiranwa afunze, kuko asubiye hanze yakongera agasubiramo ibyaha akekwaho. Kuri uyu wa Mbere tariki 04 Ukuboza 2023, Urukiko Rwisumbuye rwa Gasabo, rwasomye icyemezo rwafashe aho rwakomeje kwemeza ko uregwa akurikirana afunzwe ngo kuko hari impamvu zikomeye zagaragajwe n’Ubushinjacyaha.

Urukiko Rwisumbuye rwagendeye ku mashusho yanagendeweho n’urw’Ibanze agaragaramo Yongwe ahamagarira abantu gutanga amaturo ngo abasengere bagerweho n’ibitangaza.