Abategetsi bo mu Buhinde batangaje ko bataye muri yombi umugabo w’Umunya-Canada ku kibuga cy’indege cy’i Delhi atwaye amagufa y’igihanga cy’ingona mu muzigo we.

Ubwo yahagarikwaga bwa mbere mu igenzura ry’umutekano, uwo mugabo w’imyaka 32 yari ari ku kibuga cy’indege ku wa mbere kugira ngo afate indege yerekeza muri Canada.

Itangazo ry’ejo ku wa kane ry’urwego rwa gasutamo rw’i Delhi rigira riti: “Mu gusuzuma twamusangaye igihanga gifite amenyo atyaye, gisa n’urwasaya rw’umwana w’ingona, gipima amagarama hafi 777, cyatahuwe gipfunyitse mu gitambaro gisa n’umuhondo werurutse.”

Abo mu rwego rwa gasutamo bavuze ko uwo mugabo yatawe muri yombi ndetse ko icyo gihanga cyahawe ikigo cya leta cyita ku mashyamba n’inyamaswa.