Umunyamakuru Leo Cabrita wari umaze igihe gito akorera radio Fine Fm yamaze gutandukana nayo ku mpamvu zitatangajwe. Amakuru avuga ko Leo wari unamaze amezi atatu gusa akora kuri iyi radio, yamaze gutanga ibaruwa isezera, bivugwa ko impamvu y’itandukana rye n’ubuyobozi bwa Radio yagumye hagati ya bombi.

Leo yari asanzwe akora ikiganiro cyitwa ‘The Fine Insight’ cyari na gishya kuri iyi radio, amakuru avuga ko impamvu yatumye atandukana nay o ari nayo yatumye yari amaze hafi ibyumweru bibiri byose atumvikana kuri iyi radio. Mu butumwa bugufi yandikiye Inyarwanda Dukesha iyi nkuru, Leo yemeje ko yatandukanye na Fine FM, ariko yirinda gutangaza impamvu nyamukuru yahisemo gusesa amasezerano yari afitanye na yo.

Leo ubusanzwe anifashishwa mu kwamamaza ibikorwa bitandukanye, ikiganiro ‘The Fine Insight’ yakoraga cyagarukaga mu gufasha abantu kumenya ibijyanye n’urukundo, imyidagaduro, ubuzima n’ibindi bijyanye no gutanga inama ku myitwarire y’ingirakamaro. Si ibyo gusa kandi ijwi rye rirakunzwe cyane mu mihango itandukanye akora irimo kuyobora ibirori, ibitaramo, ubukwe ndetse n’ibiganiro by’ibyegeranyo.