Dukuzimana Ignace Kuwa 02 ukuboza 2022, nibwo urukiko rwisumbuye rwa Nyarugenge rwategetse ko Prince Kid w’imyaka 34 agirwa umwere, kuko nta bimenyetso bikomeye ku byaha yashinjwaga birimo ibyo gukoresha undi imibonano mpuzabitsina ku gahato, gusaba no gukora imibonano mpuzabitsina ku gahato no guhoza undi ku nkeke bifitanye isano n’imibonano mpuzabitsina.
Umunyamategeko wa Prince kid M. Kayijuka Ngabo ubwo yaganiraga n’umunyamakuru Jean Paul Nkundineza, yamutangarije ko ubushinjacyaha bwongeye kujuririra dosiye ya prince kid, aho dosiye ye yongeye kwinjizwa muri system y’urukiko rukuru kuwa 31 ukuboza 2022 ahagana mu gicamunsi ari narwo ubushinjacyaha bwajuririye nyine.
Yagize ati” narabibonye gusa ntago nari nafata umwanya ngo ndebe impamvu nyirizina bajuriye ariko mu gihe kiraza nzareba ubujurire impamvu bufite”. Undi munyamategeko wa Prince kid M.Nyembo we yavuze ko kugeza nanubu amakuru afite impamvu y’ubujurire bw’ubushinjacyaha itarajya ahagaragara ngo nabo bayimenye ariko byanga byakunda iyo umuntu yajuririwe aba agomba kuburana.
Ibi bisobanuye ko nubwo Prince kid yarekuwe n’urukingo rwisumbuye ariko ubu dosiye ye iri mu rukiko rukuru nanone, impamvu yo kujuririrwa kwe ikazamenyekana ubushinjacyaha nibwifuza ko ijya hanze ari nabwo Prince kid azongera kwitegura kuburana nanone.
Dukuzimana Ignace 