Umuhanzi akaba n’Umunyapolitike Bobi Wine, ni umwe mu bahanganye na Perezida Museveni mu matora yabaye 2021 yo kuyobora Uganda, nyuma y’uko bimenyekanye ko kuri uyu wa Kane tariki 18 Mutarama 2024 we n’abayoboke be barabyukira mu myigaragambyo, yabyutse asanga abashinzwe umutekano barimo Polisi n’Igisirikare bagose urugo rwe.

Bobi Wine n’abayoboke be byari biteganyijwe ko kuri uyu munsi bari bukore imyigaragambyo igamije kwamagana ikibazo cy’imihanda yangiritse bikabije, bivugwa ko Bobi Wine yari yateguye iyi myigaragambyo afatanyije n’abandi banyapolitiki batavuga rumwe n’ubutegetsi bwa Uganda, bavuga ko bababajwe n’iki kibazo cy’imihanda mu gihe Uganda iri kwitegura Inama ebyizi zikomeye ku rwego mpuzamahanga.

Uyu muhanzi ufite abakunzi benshi muri Politiki yavuze ko igisirikare n’Igipolisi bamubujije kuva iwe mu gace ka Magere mu Majyaruguru ya Kampala. Ubutumwa yanyujije ku mbuga nkoranyambaga bugira buti “Abasirikare n’abapolisi benshi bagose urugo rwanjye bamfungira mu nzu, ariko imyigaragambyo yo irarimbanyije. Musane imihanda yacu! Murekure imfungwa za Politiki! Mureke Uganda yibohore!”

Bobi Wine ni umwe mu banyapolitike batavuga rumwe n’ubutegetsi bwa Perezida Museveni ndetse no mu matora aherutse yaje amukurikiye ku mwanya wa kabiri n’amajwi 35%.