Umunyemari Jeff Bezos uri no mu bashinze ihahiro ryo kuri internet rizwi nka Amazon, ari guteganya ko umwaka utaha uzarangira agurishije imigabane ibarirwa agaciro ka miliyari 8,6$, yari afite muri iri hahiro.

Ibyo kugurisha imigabane kwa Bezos kandi byashyizwe muri raporo y’umwaka y’iki kigo, yashyizwe hanze ku wa 02 Mutarama 2023, nk’uko itegeko rya Komisiyo ya Leta Zunze Ububwe za Amerika ishinzwe imari n’imigabane ribigena, aho iyi komisiyo iba ishaka ko iyo imigabane igiye kugurishwa, iba igomba gushyirwa hanze bikamenyekana ko iri ku isoko.

Iyi raporo igaragaza ko iyi migabane ya Bezos izaba yarangije kugurishwa bitarenze ku wa 31 Mutarama 2025.

Bezos w’imyaka 60 mu 2021 yavuye ku mwanya w’umuyobozi mukuru w’iki kigo ariko aguma ku mwanya w’umuyobozi mukuru w’inama y’ubutegetsi.

Ni imirimo yavuyeho agamije guha umwanya uhagije ikigo cye bwite cya Blue Origin gikora indege kigatanga n’izindi serivisi zijyanye n’ingendo zo mu kirere, kugira ngo gikomeze gutera imbere.

Mu Ugushyingo 2023, Bezos yimukiye i Florida avuye i Washington, ibintu yakoze mu buryo bwo guhunga imisoro yagombaga kwakwa ku nyungu y’iriya migabane ateganya kugurisha cyane ko muri Leta ya Florida ho batayaka.

Kugeza uyu munsi Amazon ibarirwa agaciro ka miliyari 1775$, ibituma iba ikigo cya kane gihenze ku Isi. Uretse ibigo, Bezos ubarirwa umutungo wa miliyari 180$ ni we muntu ku giti giti cye ufitemo imigabane myinshi, aho yihariye irenga 9,56%.