Mu gihe abanyeshuri biga mu mashuri yisumbuye batangiye gukora ibizamini bya Leta ku wa 23 Nyakanga 2024, inkuru ikomeje gusakara hano mu Rwanda, iravuga ko umunyeshuri witwa NYIRAMAHIRWE Claudine uri gukorera ikizamini cyo gusoza umwaka wa gatandatu w’amashuri yisumbuye kuri site ya College Baptiste de Kabaya(CBK) mu Karere ka Nyabihu, yafashwe n’ibise ubwo yari ari gukora ikizamini cya Leta.

Ni amakuru yamenyekanye ku wa 24 Nyakanga 2024, ni nyuma yo gukora ikizamini cya mbere cya Entrepreneurship II, aho uyu mukobwa yafashwe n’inda agahita yihutanwa mu Bitaro bya Kabaya biherereye muri aka karere ka Nyabihu ahita abyara umwana w’umukobwa.

Ubuyobozi bw’Akarere ka Nyabihu bubinyujije kuri kuri X [yahoze ari Twitter], bwatangaje ko uyu munyeshuri uri gusoza amashuri yisumbuye yabyaye neza kandi ko anameze neza we n’umwana we. Amakuru avuga ko uyu munyeshuri asanzwe yiga mu mwaka wa gatandatu indimi n’Ubuvanganzo.