Umupadiri gaturika, ukora kuri paruwasi ya mutagatifu Petero muri Ruai, iherereye mu gihugu cya Kenya, yasanzwe yapfuye nyuma yo guta ubwenge muri hotel iri ahitwa Murang’a County. Raporo ya polisi yavuze ko uyu mupadiri witwa Joseph Kariuki Wanjiku w’imyaka 43 yinjiye muri iyo hotel mu ijoro ryo kuwa gatanu aherekejwe n’umugore w’imyaka 32 y’amavuko.

Ikinyamakuru citizen.digital cyo muri Kenya cyatangaje ko Polisi kandi yavuze ko uwo mugore banasanzwe bakorana muri Ruai, kuwa gatandatu saa mbili z’ijoro ngo uwo mugore yabwiye ubuyobozi bwa hotel ko padiri ari kuzungererwa ndetse akanata ubwenge [Unconcious] bahita bamujyana kwa muganga aho hafi.

Bahise bamujyana kwa muganga mu bitaro byitwa Kenol hospital akigeraho abaganga bavuga ko yapfuye akiri no mu modoka ya Toyota Harrier y’ibara ry’umukara. Polisi yavuze ko umurambo wa padiri yawugezeho utwikiriye igice kimwe amashuka yo muri hotel, ariko mu kanwa ke hari kuvamo urufuro nk’umuntu wariye cyangwa akanywa ibintu runaka.

Umurambo wa padiri wajyanwe mu buruhukiro bw’ibitaro bya Mater muri Nairobi, mu gihe polisi yari igikomeje iperereza.