Umupolisi ufite ipeti rya ‘Chief Inspector of Police’ (CIP) wo muri Kenya yishwe arashwe nyuma y’uko arashe umucamanza mu rukiko mu murwa mukuru Nairobi, nyuma gato yuko afashe icyemezo mu rubanza amakuru avuga ko umugore we aregwamo.

Uyu mupolisi yarashe umucamanza mukuru, Monica Kivuti, wo mu rukiko rwa Makadara, Bivugwa ko uwo mupolisi mukuru yarakajwe n’icyemezo cy’urukiko cyo kuburizamo gufungurwa by’agateganyo kw’umugore we nyuma yuko yari yarabuze.

Uwo mupolisi witwa Kipchirchir Kipruto, yari akuriye Sitasiyo ya polisi yo mu mujyi wa Londiani, mu Burengerazuba bwa Kenya, yahise asohora imbunda arasa umucamanza, aramukomeretsa. Abandi bapolisi bakuru bari bari mu rukiko basubije ako kanya, umwe muri bo arasa uwo mupolisi mukuru watangiye kurasa, aramwica.

Muri uko kurasana, abandi bapolisi bakuru batatu bakomeretse, nk’uko bikubiye muri raporo ya polisi isobanura ukuntu byose byagenze. Kuri ubu uwo mucamanza n’abapolisi bakuru bakomeretse barimo kuvurirwa mu bitaro.

Urwego rw’ubucamanza rwa Kenya rwagize ruti “uwo mucamanza yasheshe kurekurwa by’agateganyo hatanzwe ingwate ku muntu ushinjwa utaritabye urukiko ndetse wari wananiwe gutanga ibisobanuro bishimishije ku kutitaba urukiko.”

Uru rwego rw’Ubucamanza rwakomeje rugira riti “Ako kanya iki cyemezo kigitangazwa, umuntu yarashe umucamanza amukomeretsa mu mayunguyungu.” Iryo tangazo kandi ryavuze ko amakuru y’ibanze avuga ko “uwarashe ni umupolisi mukuru washakanye n’ucyekwa.”

Ku rundi ruhande Polisi y’igihugu cya Kenya yavuze ko uwo mupolisi mukuru yari ari mu rukiko ku mpamvu zitazwi. Yongeraho ko amaperereza akomeje kugira ngo hamenyekane icyateje uko kurasa, byabereye imbere mu rukiko, byatumye Abanya-Kenya benshi bagwa mu kantu.

Polisi yagiye akenshi ishinjwa kugira uruhare mu bwicanyi butemewe n’amategeko, ariko nta bwicanyi nk’ubwo bwari bwarigeze butangazwa ko bwabereye imbere mu rukiko. Urwego rw’ubucamanza rwavuze ko ruzavugurura ingamba z’umutekano ndetse rwijeje umutekano abakozi bo mu bucamanza n’abandi bagana inkiko.

Umwanditsi mukuru w’ubucamanza, Winfridah Mokaya, yagize ati “Nk’umuryango w’ubucamanza, twifurije mugenzi wacu gukira vuba. Tunihanganishije umuryango w’umupolisi mukuru wapfiriye muri ibi byabaye bibabaje.”

Ivomo: BBC