Ignace DUKUZIMANA 
Mu mudugudu wa Rugwa, akagari ka Nyabinyenga, Umurenge wa Cyabakamyi ho mu karere ka Nyanza, hagaragaye umurambo w’umusore ku mugezi bavomaho, ibuyobozi buvuga ko basanze acigatiye icupa ririmo inzoga nke.
Nyakwigendera yitwa Nsengiyumva Anastase yari ingaragu, yari acumbitse mu mudugudu wa Karehe muri uyu murenge ari naho avuka. Burezi Eugene, umunyamabanga nshingwabikorwa w’uyu murenge yavuze ko nyakwigendera byagaragaraga ko yanyoye nk’uko Umuseke babitangaje, kuko basanze afite ivide ririmo inzoga nkeya itarashiramo bigaragara ko yahoze anywa ariko atarayimaramo.
Abayobozi batanze amakuru avuga ko nyakwigendera yabanje kunywa inzoga mu kagari ka Rurangazi mu murenge wa Nyagisozi, anakomeje I Cyabakamyi hafi y’aho atuye akomeza kunywa. Umurambo we wajyanwe mu bitaro bya Nyanza kugira ngo hakorwe isuzuma ry’icyamwishe, naho urwego rw’igihugu rw’ubugenzacyaha rukaba rwatangiye iperereza kugira ngo hamenyekanye icyamwishe.
