Fabrice Nahimana Urukiko Rwisumbuye rwa Rusizi mu mpera z’icyumweru gishize rwaburanishije urubanza Ubushinjacyaha buregamo umugabo w’imyaka 72 ukurikiranweho kwica umugore w’imyaka 35 nyuma yo gukorana nawe imibonano mpuzabitsina.
Icyaha akurikiranweho bivugwa ko yagikoze mu ijoro ryo ku itariki ya 04/09/2025 mu Mudugudu wa Murwa, Akagari ka Pera, Umurenga wa Bugarama, mu Karere ka Rusizi, aho uregwa yahuriye ku muhanda na nyakwigendera bakumvikana ko bajyana mu rugo bakaryamana.
Nyuma yo gusambana nk’uko bitangazwa n’Ubushinjacyaha Bukuru, uregwa yasohotse mu nzu agiye kunywa itabi agarutse abura amafaranga ibihumbi bitanu akeka ko ari nyakwigendera uyatwaye. Mu gushyamirana ayamwaka yafashe inyundo ayimukubita mu mutwe no ku maguru aramwica.
Ubushinjacyaha bwamusabiye igihano cy’igifungo cya burundu hashingiwe ku ngingo ya 107 y’ Itegeko nº 68/2018 ryo ku wa 30/08/2018 riteganya ibyaha n’ibihano muri rusange.
