Umusaza witwa HATUNGURAMYE Suedé w’imyaka 74 afungiwe kuri RIB Sitasiyo ya Busasamana mu Karere ka Nyanza, nyuma yo gufatanwa utubure tw’urumogi 29, aho bivugwa ko asanzwe arucuruza.

Amakuru avuga ko ibi byabereye mu Murenge wa Busasamana, mu kagari ka Kavumu mu Mudugudu wa Karukoranya B. Ubuyobozi bw’Akagari bufatanyije n’ubuyobozi bw’Umudugudu, bwafashe uyu musaza, acuruza urumogi, akaba yafatanywe udupfunyika 29.

Umwe mu bayobozi bo mu nzego z’ibanze muri kariya gace yabwiye UMUSEKE ko uriya musaza hari amakuru ko asanzwe acuruza urumogi gusa bimeze nkaho hari umuntu arucururiza. Uyu avuga ko “bigaragara ko atari uyu musaza uruhinga cyangwa ngo arwirangurire.”