Ignace DUKUZIMANA 
Kuri uyu wa 12 Gashyantare 2024, umusore w’imyaka 23 wo mu Karere ka Rubavu, Umurenge wa Mudende, Akagari ka Bihungwe, mu Mudugudu wa Bihungwe yiyahuye akoresheje umuti wica udukoko uzwi ku izina rya tiyoda.
Amakuru avuga ko uyu musore wiyahuye yari amaze icyumweru kimwe ashatse umugore mu buryo butemewe n’amategeko. Nyakwigendera nta nzu yagiraga yari yararongoreye mu nzu ya se. Nyuma yo kurongora iwabo bamuhaye isambu yo kubakamo arayanga, ashaka kwiha indi yihitiyemo ntibabyumvikanaho n’ababyeyi be.
Mu gitongo cyo kuri uyu wa Mbere, yahengereye ababyeyi be bagiye mu kazi, anywa umuti wa kiyoda, abavandimwe be bumva ataka ngo mu nda hari kumurya bahamagara umuturanyi, umuturanyi ahamagara Umuyobozi w’Umudugudu bamujyana ku Kigo Nderabuzima cya Mundende abapfira mu maboko bataramugezayo.
Umunyamabanga nshingwabikorwa w’Umurenge wa Mudende, Murindangabo Eric yabwiye IGIHE ko uyu musore akimara kwitaba Imana abari bamujyanye kwa muganga bahise bamusubiza mu rugo baramushyingura. Ati “Icyo dusaba abaturage ni ukwirinda amakimbirane, ufite ikibazo bakakiganuraho mu muryango cyananiraga akegera ubuyobozi bukamufasha”.
Ignace DUKUZIMANA 
