Umusore w’imyaka 28 wo mu karere ka Musanze aravugwaho kuba yashatse kwiyahura akoresheje umuti witwa Rokete, ariko bakamutesha atarawumara bakamujyana mu bitaro bya Ruhengeri. Uyu musore ni uwo mu murenge wa Musanze mu kagali ka Garuka.

Amakuru ava mu baturage avuga ko uyu musore yagize agahinda ubwo yari amaze gusesagura amafaranga ibihumbi 400frw yari agurishije ikibanza cye, ariko aza gusanga nta n’ifaranga asigaranye ahita acura umugambi wo kwiyahura. Ngo uyu musore yaguzemo inzoga muri ayo mafaranga yinezeza no mu bundi buryo, kugeza yisanze nta mafaranga asigaranye, ahitamo kwiyahura.

Gitifu w’akagali ka Garuka, Zirimwabagabo Ildefonse, yavuze ko ubwo abaturage bamubonaga yisaza ari kunywa uwo muti bahise bawumwaka atarawumara, batabaza ubuyobozi buraza bujyana uwo musore ku kigo Nderabuzima cya Musanze, akomeje kuremba ajyanwa mu bitari bya Ruhengeri.