Umusore w’imyaka 20 ya’mavuko uturuka mu murenge wa Gishamvu mu karere ka Huye, akurikiranwe n’inzego z’ubutabera aho yateye umugabo icyuma mu mutima amuhoye amafaranga ibiceri 200 frw y’amasambusa uyu mugabo yariye ntamwishyure. Uyu musore uri gukurikiranwa n’ubushinjacyaha ku rwego rwisumbuye rwa Huye, akurikiranweho kwica umugabo w’imyaka 35.

Ubushinjacyaha buvuga ko iki cyaha cyabaye kuwa 2 mata 2023 mu mudugudu wa Akagahaya, akagari ka Nyumba. Buvuga ko intonganya hagati y’aba bombi zatangiye ubwo nyakwigendera yaryaga isambusa z’uyu wamwishe, ntamwishyure bagaheraho batongana kugeza amwishe amuteye icyuma mu mutima.

Uyu musore ubwo yabazwaga n’ubushinjacyaha, yavuze ko yemera ko yishe uyu mugabo kuko yamuteye icyuma ahita aryama hasi. Iki cyaha uyu musore akurikiranweho kiramutse kimuhamye yahabwa igihano cyo gufungwa burundu nk’uko biteganywa n’ingingo y’107 y’itegeko riteganya ibyaha n’ibihano muri rusange.