Umutwe witwaje intwaro wa M23 ukorera muri RD Congo wongeye gushinja ingabo za Leta FARDC n’abambari bayo barimo FDLR kuwugabaho ibitero ikanamisha ibisasu mu baturage.

Umuvugizi wa M23, Lawrence Kanyuka yatangaje ko kuva saa 17h45 zo kuri uyu wa Mbere Mutarama 2024, ingabo zihuriweho n’ubutegetsi bwa Kinshasa, zagabye ibitero mu duce dutuwe cyane turimo Karubaba.

Kanyuka yagize ati “kuri uyu wa Mbere kuva 17h45, ingabo zihuriweho n’ubutegetsi bwa Kinshasa cyane nka FARDC, FDLR, MERCENAIRES, MILICES n’ingabo z’u Burundi zagabye ibitero mu duce dutuwe cyane harimo na Karubaba iri mu nkengero zayo, bisaba ko natwe twirwanaho turengera abaturage.”

Mu itangazo uyu Muvugizi wa M23 yanyujije kuri Twitter (X) yasabye urubyiruko, abanyapolitiki, n’ingabo zishaka guharanira amahoro kwiyunga ku ihuriro rya Alliance Fleuve Congo (AFC) rirwanya imiyoborere ya Repubulika Iharanira Demokarasi ya Congo.

Ni ihuriro ryashinzwe na Coroneille Naanga mu mpera z’umwaka ushize nyuma riza kuvuga ko rigiye kwagura imikoranire na M23 kugira ngo bifatanye kurwanya ubuyobozi bwa Tshisekedi.