Amashusho n’ifoto by’umwana w’umukobwa wagaragaye ku muhanda ari gucuruza ku gataro anasubiramo amasomo kuko yasomaga amakayi yicaye hafi y’agataro yakoze benshi ku mutima, ndetse abazamurira amarangamutima bavuga ko akwiye gufashwa kubera umuhate afite.

Iyi foto ndetse n’amashusho byashyizwe kuri twitter n’uwitwa Tito Harerimana kuri uyu wa 13 gicurasi, ndetse ashyiraho n’ubutumwa buyaherekeza avuga ati” nkibona uyu mwana w’umukobwa nabonye ishyaka, umuhate, ubwitange, guhatana, ubutsinzi, urukundo, icyizere cy’ejo hazaza, numva ndanezerewe kubera ko ubu butwari bugaragara hake, nabonye akwiye ibirenze ibi. Imana ijye iha umugisha uyu muhate”.

Tito Harerimana yabwiye RADIOTV10 ko aya mashusho yayafashe kuwa kabiri w’iki cyumweru ubwo yari munzira yigendera I Gikondo ahitwa SENSINIKE akabona uyu mwana w’umukobwa yicaye ku muhanda arimo gucuruza agataro ndetse anasubiramo amasomo. Yakomeje avuga ko yageze murugo nyuma yo kumubona, ariko yakomeza kumutekerezaho akabura amahoro aribwo yafashwe umwanzuro wo kujya iwabo akajya kumusura.

Yavuze ko yahisemo gushyira aya mashusho n’amafoto kuri twitter ye kugira ngo agaragaze umuhate w’uyu mwana, ndetse nyuma yo kugera iwabo mu rugo agasanga uyu mwana afite abandi bavandimwe be batandatu n’umubyeyi umwe utagira akazi ahubwo bakaba batunzwe n’amafranga ava mu bucuruzi bw’uyu mwana. Amina Uwikuzo ariwe Uyu mwana yavuze ko akunda kwiga cyane kuburyo yifuza kuzarangiza amashuri akagera kure akavana umuryango we mu bukene.

Ni abantu benshi bakozwe ku mutima n’uyu mwana, kuko hari n’abavuze ko bamugeza kuri Aline gahongayire ko byanga byakunda ashobora kumufasha, gusa mu bitekerezo byatanzwe kuri ayo mafoto n’amashusho kuri twitter, n’umunyamakuru yago ukorera kuri Yago Tv show isanzwe ikorera ku muyoboro wa Youtube yanditse atakamba avuga ati” wampuje n’uyu mwana please”, arenzaho n’utu emoji turi guta amarira.

“Ese miss Meghan NIMWIZA yaba yarasezeye mu marushanwa ya miss Rwanda nk’umu Judge kubera Prince kid?”| abakunzi ba miss Rwanda bafite ibyo bari kubivugaho.