Umusifuzi wo mu gihugu cya Turikiya witwa Halil Umut Meler, yakubiswe na Perezida w’ikipe yitwa MKE Ankaragucu, Faruk Koca, ibi byabaye ku munota wa 97 w’umukino wa wahuzaga iyi kipe na Caykur Rizespor, ubwo iyi kipe yatsindwaga igitego cyo kwishyurwa, bikaba 1-1, Faruk yirukankiye mu kibuga akubita umusifuzi.

Nyuma y’uyu mukino Ubuyobozi bw’umupira w’amaguru muri Turikiya bwafashe icyemezo cyo guhagarika shampiyona zose nyuma y’uko umusifuzi yatewe igipfunsi na Perezida w’ikipe, akagwa hasi mu mukino w’icyiciro cya mbere wabaye kuri uyu wa Mbere. Uyu mukino umaze kurangira Perezida w’Ishyirahamwe ry’umupira w’amaguru muri Turikiya (TFF), Mehmet Buyukeksi, yatangaje ko “amarushanwa yose ahagaritswe mu gihe kitazwi.”

Yagize ati “Ibyabaye ni igisebo ku mupira w’amaguru muri Turikiya” bivugwa ko uyu musifuzi kandi yakubiswe n’abandi bantu ubwo yari aryamye hasi mu kibuga, byamuviriyermo kuvunika bidakabije. Nyuma y’ibi bivugwa ko habaye imvururu zagaragayemo abakinnyi n’abayobozi b’ikipe.

Uyu musifuzi wakubiswe, Halil Umut Meler afite imyaka 37 y’amavuko, ni umwe mu basifuzi bakomeye muri Turikiya ndetse asifura imikino mpuzamahanga yemewe na FIFA. Ikipe ya MKE Ankaragucu yatangaje ko yababajwe n’ibyakozwe na perezida wayo, ndetse bavuga ko basabye imbabazi abakunzi bayo ndetse n’umuryango wa siporo muri rusange.