Uwahoze ari umukinnyi wa Rayon Sports, Hertier Luvumbu akaza gutandukana n’iyi kipe biturutse ku bihano yari yahawe n’Ishyirahamwe rya Ruhago mu Rwanda (FERWAFA), akomeje guhura n’abayobozi bakomeye b’iki gihugu nyuma y’uko akihagera yabanje guhura na Minisitiri wa Siporo n’Imyidagaduro muri RDC, Francois Claude Kabulo Mwana Kabulo.

Amakuru ava muri iki gihugu avuga ko uyu mukinnyi yahuye na Minisitiri w’Ingabo za Repubulika Iharanira Demokarasi ya Congo, Jean Pierre Bemba. Luvumbu yafatiwe ibihano by’amezi atandatu adakina kubera igikorwa cya politiki yari yakoreye mu mukino w’umunsi wa 20 wa shampiyona Rayon Sports yatsinzemo Police FC ibitego 2-1.

Luvumbu akigera iwabo yagiye kuri radiyo zitandukanye atangira gukwirakwiza amakuru avuga ko hari bamwe mu Banyarwanda bari batangiye kumwoherereza ubutumwa bumutera ubwoba, ndetse anashinja Ingabo z’u Rwanda kuba zari zatangiye kugota aho yari atuye nyuma y’ibyo yakoreye muri uriya mukino.

Nk’uko byatangajwe n’Ibiro Ntaramakuru ACP by’abanye-Congo, Luvumbu ahuye na Jean Pierre Bemba kugira ngo amusobanurire neza ibyamubayeho ubwo yari mu Rwanda ndetse ngo yamwakiriye mu rwego rwo kumuha ubufasha akeneye mu izina ry’Umugaba w’Ikirenga w’Ingabo za RDC (Tshisekedi).