Fabrice Nahimana Urukiko rw’ikirenga rwa Kisii, muri Kenya, rwatangaje umwanzuro watunguye benshi, aho rwategetse ko umugore wemerewe n’inkiko ko yatandukanye n’umugabo, agomba gusubiza inkwano yahawe n’umuryango w’umugabo.
Uyu mwanzuro wasomwe ku wa 31 Ukwakira 2025 na Justice D.K.N. Magare, wasobanuye ko mu muco wa Kenya, ubukwe budaseswa burundu mu gihe inkwano itarasubizwa.
Yagize ati: “Mu muco wacu, ubukwe buseswa ari uko inkwano isubijwe. Iyo se w’umugore atabishaka, umugore afite imyaka ibiri yo gufata icyemezo cy’ubutabera kugira ngo inkwano isubizwe.”
Urukiko rwasobanuye ko inkwano igomba gusubizwa yose, yaba ari amafaranga cyangwa amatungo, kandi ko nyuma yo gutandukana, nta na rimwe umugabo cyangwa umugore basigara bafite inshingano zo gutunga cyangwa gufasha undi.
Ku bijyanye n’abana, Justice Magare yavuze ko abana bafite uburenganzira bwo gukomeza kugira umubano n’ababyeyi bombi.
Yagize ati: “Umugabo ashobora kuba atari umugabo mwiza, ariko ntibivuze ko ari se mubi. Ababyeyi bombi bagomba gusangira inshingano zo kurera no gufasha abana babo.”
Uyu mwanzuro wakomeje gutera impaka zikomeye muri Kenya. Bamwe bawushimye bavuga ko usigasira umuco gakondo w’Abanyakenya, mu gihe abandi bawita intambwe isubiza inyuma uburinganire n’itegeko ry’umuco w’iki gihe.
Abahanga mu by’amategeko bavuga ko iyi ngingo ishobora kuba icyitegererezo ku manza z’itandukana ziri imbere, cyane cyane mu duce tugifite umuco wo gutanga no gusubiza inkwano.
Mu gihe Kenya ikomeje kugerageza guhuza umuco wa kera n’amategeko agezweho, uyu mwanzuro wagaragaje uburyo ibyo byombi bishobora kugongana, ariko nanone bigafatwa nk’isomo rikomeye ku buzima bw’imiryango muri sosiyete igezweho.
