Fabos Fali Umubare w’abagore bagura imiti ikuramo inda n’irinda gusama muri Leta Zunze Ubumwe za Amerika, ukomeje kwiyongera mbere y’uko Donald Trump ajya ku butegetsi.
Aid Access, imwe mu masosiyete akomeye atanga imiti ikuramo inda yatangaje ko yakiriye ibyifuzo 10,000 by’abashaka iyo miti mu masaha 24 nyuma yo gutsinda kwa Trump.
Ubusanzwe ku munsi iyi sosiyete isanzwe yakira nibura ibyifuzo 600.
Urubuga Plan C rutanga amakuru yo kubona imiti ikuramo inda rwatangaje ko Trump amaze gutorerwa kuyobora Amerika, rwasuwe n’abagera ku 82,200, mu gihe rwasurwaga n’abantu 4000 cyangwa 4,500 ku munsi mbere y’itorwa rya Trump.
Trump ni umwe mu badashyigikira na mba ibyo koroshya uburyo bwo kubona imiti yo gukuramo inda cyangwa kuboneza urubyaro.
Mu 2022 Urukiko rw’Ikirenga rwa Amerika rwakuyeho itegeko ryemerera abagore n’abakobwa kubona imiti yo kuboneza urubyaro no gukuramo inda mu buryo bworoshye. Bivugwa ko byakozwe ahanini n’abacamanza Trump yasize ashyize muri urwo rukiko, bafite imyumvire nk’iye.
Trump yavuze ko najya ku butegetsi azakomeza guharanira ko gukuramo inda cyangwa kuboneza urubyaro bikorwa bitari mu kavuyo, zikaba serivisi zihariye zihabwa ababikwiriye gusa.
Fabos Fali 