Mikheil Kavelashvili wigeze gukinira ikipe ya ruhago ya Manchester City ni we watorewe kuyobora igihugu cya Georgia. Biteganyijwe ko aza kurahira kuri uyu wa Gatandatu imbere y’inteko ishinga amategeko yacitsemo ibice, nyuma y’imyigaragambyo imaze iminsi 16 iyogoza igihugu ikorwa n’abari ku ruhande rw’Umuryango w’Ubumwe bw’Uburayi.

Mikheil Kavelashvili w’imyaka 53, yahoze ari umudepite wo mu ishyaka riri ku butegetsi, Georgian Dream Party akaba yari umukandida umwe rukumbi ku mwanya wa perezida.

Amashyaka ane y’ingenzi atavuga rumwe n’ubutegetsi yamaganye itorwa rye, ndetse yiyemeza kubangamira inteko ishinga amategeko yamutoye, kubera ko ngo amatora y’abadepite yo mu Kwakira yabayemo uburiganya bityo bakaba badashobora kwemera umukuru w’igihugu watowe nayo.

Hagati aho, Perezida wa Georgia Salome Zourabichvili ucyuye igihe ndetse akaba yari ashyigikiwe n’umugabane w’uburayi, yanenze gutorwa kwa mukeba we Kavelashvili avuga ko ari amatora y’urwenya kuko ngo yatowe n’inteko ishinga amategeko irimo amacakubiri..

Salome Zourabichvili wari umaze imyaka itandatu atowe n’abaturage ku bwiganze, ntiyemera amategeko arimo kugenderwaho muri Georgia kuko we asanga umukuru w’igihugu agomba gutorwa n’abaturage.